АСТАНА. KAZINFORM — Қазақстандық теннисші, 19 жастағы Асылжан Арыстанбекова Анталия (Түркия) ITF W15 ширек финалына жолдама алды.
Әлемнің 1293-ракеткасы А.Арыстанбекова алғашқы айналымда рейтингіде 1421-орында тұрған ирандық Мешкатолзахра Сафидың мысын басты.
Бірінші партия 6:3 есебімен Асылжанның есебіне жазылды. Екіншісінде ирандық спортшы есе қайырды — 6:4. Супер тай-брейкте қазақстандық теннисші жеңісті жұлып алды.
Бүгін А.Арыстанбекова әлемнің 1040-ракеткасы Анна Снигиревамен шеберлік байқасты. Бұл жолы Асылжан матч тағдырын екі сетте шешті — 7:5, 6:4.
Тағы бір қазақстандық, 18 жастағы Анастасия Крымкова алғашқы айналымда франциялық Эллис Рижеге жол берді — 2:6, 2:6.
Қазақстандықтар жұптық сында да өнер көрсетеді. А.Арыстанбекова Іңкәр Дүйсебаймен, А.Крымкова Ева Корышевамен бірге бақ сынайды.
Бұдан бұрын Асылжан мен Іңкәр Анталиядағы дәл осындай жарыста жеңімпаз атанған болатын.
Еске сала кетейік, бұдан бұрын Елена Рыбакинаның Қытайдағы әлемдік додада өнер көрсететінін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).