Әскери құрылыс АҚ-нан қаржы жымқыру әрекеті бойынша қылмыстық іс тергеліп жатыр

НҰР-СҰЛТАН. ҚазАқпарат - ҚР Сыбайлас жемқорлыққа қарсы іс-қимыл агенттігі «Әскери құрылыс» акционерлік қоғамынан қаржы жымқыру әрекеті бойынша қылмыстық істі тергеп жатыр. Бұл туралы ҚазАқпарат ҚР Қорғаныс министрлігінің баспасөз қызметіне сілтеме жасап хабарлайды.

Баспасөз мәліметтеріне қарағанда, Қазақстанның Қорғаныс министрлігі жалғыз акционер ретінде еншілес ұйымы «Әскери құрылыс Астана» ЖШС болып табылатын «Әскери құрылыс» АҚ-ның басшылығын ауыстырған.

Қорғаныс ведомствосының басшылығы компаниялар өкілдерімен бірнеше рет кездесулер өткізді. Олардың барысында кредиторлық берешекті өтеуге қатысты проблемалық мәселелер және оларды шешу жолдары, сондай-ақ Қоғамды оңалту рәсімдері бойынша келіссөздер талқыланды.

« Қорғаныс министрлігі «Әскери құрылыс Астана» ЖШС алдындағы барлық міндеттемелерін толық орындады. Атқарылған қызметтер үшін барлық ақшалай қаражат уақтылы аударылды. Сонымен қатар министрлік дербес шаруашылық жүргізуші субъектілердің өзара қарым-қатынасы үшін заң тұрғысында жауап бермейді. Алайда, осы мәселенің әлеуметтік сипатын ескере отырып, Қорғаныс министрлігі өз бастамасы бойынша басынан бастап жағдайды өзінің заңды құзыреті шеңберінде реттеуге белсенді түрде қатысады»,-делінген хабарламада.