АСТАНА. ҚазАқпарат – Astana Open ATP 500 турнирі іріктеу сайыстарының жеребесі тартылды, деп хабарлайды ҚазАқпарат тілшісі.
Қазақстан теннис федерациясынан мәлім еткеніндей, іріктеу сайыстарына ұйымдастырушылардан төрт қазақстандық Денис Евсеев, Григорий Ломакин, Александр Недовесов және Арысланбек Айтқұлов арнайы шақырту алды.
Д.Евсеев әлемнің 65-ракеткасы, бельгиялық Давид Гоффенмен ойнайды. Александр Недовесов колумбиялық Даниель Галанмен, Григорий Ломакин түркиялық Алтуг Челикбилекпен, Арысланбек Айтқұлов ресейлік Павел Котовтан өтуге тырысып көреді.
Сондай-ақ өзбекстандық Денис Истомин мен сербиялық Ласло Джере, Қытай теннисінің жас жұлдызы Чжичжень Чжан мен түркиялық Жем Илкель өзара бәсекеге түседі. Іріктеу сайыстарында Хамад Маджедович – Лука Нарди, Александр Шевченко – Карлос Гомес кортқа шығады.
Іріктеу сайыстары 1 қазан күні басталады.
Еске сала кетейік, бұдан бұрын Бейбіт Жукаевтың екі мәрте ел чемпионы атанғанын, теннисші Тимофей Скатовтың Лиссабон турнирінің жартылай финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).