«Астана-Павлодар» жолының 180 шақырымы жөнделеді

АСТАНА. ҚазАқпарат - «Астана-Павлодар» жолының 180 шақырымы жөнделеді. Бұл туралы бүгін Орталық коммуникациялар қызметіндегі брифингте Павлодар облысының әкімі Болат Бақауов мәлім етті, деп хабарлайды ҚазАқпарат.

«Нұрлы жол» бағдарламасы аясында облыс аумағында «Астана-Павлодар» республикалық жолының құрылысы жүргізіліп жатыр. Салынған қаражат көлемі 60 млрд теңгеге жуықтайды. Жылдың соңына дейін 180 шақырым автомобиль жолы жөнделетін болады», - деді Болат Бақауов.

Сонымен қатар өңір басшысы «Нұрлы жол» бағдарламасы аясында шағын қалаларда инженерлік инфрақұрылым нысандарын жаңғыртуға 1,3 млрд теңге бөлініп, жұмыстар жүргізіліп жатқанын атап өтті.

«Жалпы 17 шақырымнан астам инженерелік желі салынып, қайта жөнделетін болады. Бас сорғы станса жаңғыртылады. Оған соңғы 40 жылда жөндеу жұмыстары жүргізілмеген еді», - деді облыс әкімі.