Астана төрт тарапты тоғыстырар жол торабына айналады
«Қазақ айтқандай, құстың қанаты талатын үлкен даламыз бар. Сонау Кеңес одағы заманында жолдың барлығын солтүстікке, Ресейге қарай салған. Ішімен жүрейін десең, қатынасатын жол жоқ. Елдің елордасы өзінің өңірлерімен тіке жолдармен қатынаса алмайды. Онда басқарушылық жұмыстарды қалай жүргізуге болады?», - деді Мемлекет басшысы.
Елбасының алға тартқан деректеріне қарағанда, Қазақстанда соңғы 11 жылдың ішінде 48 мың шақырым автокөлік жолы салынып, 1100 темір жол күрделі жөндеуден өткізіліп, жаңадан төселген.
«Бұл орасан жұмыс. Бірақ, біздің ұланғайыр даламыз бар. тіпті осындай қарқынмен жұмыс істесек те біз келесі ғасырға дейін сала береміз, сала береміз, бітпейді. Сондықтан Астана Қазақстанның саяси-экономикалық, мәдени орталығы ғана емес, инфрақұрылымдық жүрегі болуы керек. Астанадан заман талаптарына сай төрт тарапқа түгел жол салынуы қажет», - деген ҚР Президенті темір жол, әуе қатынастары да басты назарда болатындығын баса айтты.