Астанада «Байтақ» жасылдар партиясының кезекті ІІІ съезі өтті
Ауқымды жиынға партияның барлық өңірлік филиалдарының төрағалары мен белсенді мүшелері қатысты.
Съездің ашылуында алғаш болып сөз алған партия төрағасы Азаматхан Әміртаев саяси ұйымның атқарған жұмыстарына тоқтала келе, партияны ұйыстырған басты мүддені еске салды.
«Бұл партия ең алдымен Қазақстан халқының болашағы үшін құрылғанын еске саламын. Келешек ұрпақтарының игілігі жолында жұмыс істеуіміз керек. Әлемдегі урбанистік мәселелерді көре отырып, оған дер кезінде әрекет етпеу, табиғи ортаға бей-жай қарау жақын арада жаһандық деңгейдегі экологиялық апатқа әкелуі мүмкін. Сондықтан біз қарапайым тұрғындардың өмір сүру сапасын жақсарту үшін заңнамалық базаны өзгерту арқылы қажетті деңгейде көңіл бөлу керек деп санаймыз. «Жасыл» партиялар әлемнің 90-ға жуық елінде бар. Біз олармен бірлесе отырып, өзара тиімді іс-қимыл жасауға мүдделіміз», - деді Азаматхан Әміртаев партияның кезекті съезінде сөйлеген сөзінде.
Мұнымен қатар, съезде саяси кеңес құрамы жаңартылып, өзге де партияішілік комиссия төрағаларымен олардың мүшелері сайланды.
Сондай-ақ, саяси ұйымның келешек жұмыс жоспары мен міндеттері бекітілді.
Айта кету керек, «Байтақ» жасылдар партиясы былтыр 28 қарашада ресми тіркелді және биыл наурызда өткен Парламент сайлауына қатысты.
Оның нәтижесінде партия мәслихаттардан 23 мандат алды.
Бүгінде «Байтақтың» Қазақстан бойынша 20 филиалы жұмыс істейді, 30 мыңнан аса партия мүшесі бар.
Сондықтан съезде осы аралықта саяси ұйымның атқарған жұмыстары баяндалды.
«Біздің бүкіл ел бойынша кәсіби мамандарымыз бар. Олар табиғи ресурстарды теріс мақсатта пайдалануды азайту үшін әлеуметтік реформалар жасау ісіне өз үлесін қосып келеді. Бүгіннің өзінде бұл бағытта оң өзгерістер бар», - деп тоқталды партия төрағасы.
Оның сөзінше, өзі жетекшілік етіп отырған саяси ұйым жылу электр орталықтарына қатысты ұстаныстар дайындап, құзырлы органдарға жолдауда.
Азаматхан Әміртаев бұл мәселенің маңызын атап, былтыр еліміз бойынша жылу электр орталықтарында болған ірі апаттарды мысалға келтірді.
«Қалалардағы халық санының өсуі және тұтынушылар санының артуына байланысты резервтердің сарқылу қаупі бар. Заңнамалық базаны өзгерту, кәсіпорындарды жаңғырту, қауіпсіз еңбек жағдайларын жасау, бизнеске жәрдемдесу арқылы біз әлеуметтік және экологиялық проблемаларды шеше аламыз. Бұл өз кезегінде ел экономикасына тиетін теріс әсерлердің алдын алуға ықпал етеді», - деп ұсыныс білдірді Азаматхан Әміртаев партияластарының алдында баяндама жасай отырып.
«Байтақ» жасылдар партиясының мүшелері Мемлекет басшысы Қасым-Жомарт Тоқаевтың Жарлығымен бекітілген «Қазақстан Республикасының 2060 жылға дейінгі көміртегі бейтараптығына қол жеткізу стратегиясының» маңызы жоғары екенін атап өтті.
Осы бағыттағы жұмыстарды атқару үшін аталған саяси ұйым өз тарапынан толық қолдау көрсетуге әзір екенін мәлімдеді.
Бұған қоса, партия төрағасы Азаматхан Әміртаев кейінгі жылдары жиілеп кеткен басты проблеманы атады.
Ол – орман өрттері. Азаматхан Әміртаев елдің экологиялық ахуалына айтарлықтай залал келтіріп, Қостанай мен Семей орманының біршама аумағын күлге айналдырған тілсіз жаудың алдын алуға бағытталған шаралар қабылдау маңызды екенін баса айтты.
«Семей орманының» мүшкіл хәлде тұрғанын біз сәуір айындағы Парламент отырысында ескерттік. Мен үнемі еліміздің түкпір-түкпіріне іс сапар жасап, филиалдар мен түйткілі шешілмеген орындарға барамын. Біз 23 сәуірде «Семей орманы» резерватының жай-күйі нашар екенін жеткіздік. Алайда, бізді ешкім естімеді және оның зардабы 14 адамның өмірін жалмады. Әрине, егер біз Мәжіліске өткенде дауысымыз естілер еді. Бұл жағдайлар біздің партиямыз сол жерде болуы керек деген белгі сияқты», - деп пікір білдірді Азаматхан Әміртаев.
Съезде көтерілген ірі мәселенің бірі – қоршаған ортаға зиянды шығарындысы аз, баламалы энергия көздерін дамыту.
Жиналған партия сарапшыларының айтуынша, электр энергиясын экологиялық таза жолмен өндіру ластану деңгейін бірнеше есе азайтады.
«Жасыл энергияны тұрақты өндіру және тұтыну ұзақ уақыт бойы әлем елдерінің күн тәртібінде тұрған мәселе. Біз мемлекет тарапынан қолдау қажет деп санаймыз. Осындай жобаларды қаржыландыруды ұлғайту үшін жұмыс істеу маңызды. Біздің мақсат та осы», - деген пікірде «Байтақ» жасылдар партиясының мүшелері.
Бұдан бөлек, саяси ұйым құрамындағы сарапшылар Алматы қаласының экологиялық ахуалын жақсарту бойынша ұсыныстарын ортаға салды.
Атап айтқанда, мегаполистің жеке секторын газбен қамту ауа сапасын тұрақтандыруға оң әсер етеді.
Партия мүшелерінің сөзінше, бүгінде Алматыдағы ауаның ластануы қалыпты көлемнен 11 есе көп.
Съезд барысында ортаға салынып, талқыға түскен маңызды проблемалар партия отырысың хаттамасына енгізілді.
Тиісінше, оны шешу бойынша ұсыныстар әзірлеу, Үкімет тарапынан қолға алынған істерге қолдау таныту жұмыстары жүргізілмек.