Астанада қандастарға арналған қайырымдылық шара өтті
АСТАНА. KAZINFORM — Дүниежүзі қазақтары қауымдастығының Астана қалалық филиалы қасиетті Ораза айының құрметіне шетелден көшіп келген қандастарға арнап қайырымдылық шарасын ұйымдастырады.
Іс-шара аясында кәсіпкер азаматтардың демеушілік жасауымен жаңадан көшіп келген, тұрмысы нашар көпбалалы және көмекке мұқтаж 20 шақты отбасыға ұн, күріш, жұмыртқа, сұйық май, картоп сынды өнімдері бар азық-түлік себеттері таратылды.
— Рамазан айы — қайрымдылық, ізгілік жасайтын, адамдарға мейрім бағыштайтын қасиетті ай. Біз осы орайда шетелден келіп қоныстанып жатқан қиыншылығы бар отбасыларға аз да болса көмектесейік деп шештік. Қандастарға қолдау көрсету — баршамыздың ортақ міндетіміз. Ағайындарға мейір бағыштау және оларға еліміздің, халқымыздың мейірін сезіндірудің мәні зор деп ойлаймын, — деді Дүниежүзі қазақтары қауымдастығының Астана қаласы филиалының басшысы Ғалым Үлкенбайұлы.
Айта кетейік, 1991 жылдан бері Қазақстанға 1 млн 128 мыңнан аса этникалық қазақ оралды. Мемлекет тарапынан оларды қолдау мақсатында түрлі бағдарламалар іске асырылып, бейімделуге жағдай жасалып келеді. Өткен жылы Қазақстан азаматтығын 20,2 мың адам алды.
Оның ішінде 15,6 мыңы немесе 77% қандас. Бұл 2023 жылмен салыстырғанда 25%-ға аз. 2023 жылы 26 828 адам Қазақстан азаматтығын алған еді. Оның 20,5 мыңы — қандас болған. Көшіп келгендердің тең жартысы Өзбекстаннан келген. Қалғаны — Қытай, Моңғолия, Түрікменстан, Ресей және басқа да мемлекеттен қоныс аударғандар.
Бұған дейін, соңғы жылдары Қазақстан азаматтығын алушылар саны 25 пайыз азайғанын жазған едік.