Астанада қар күреуге мыңдаған жол жұмысшысы шықты

АСТАНА. KAZINFORM – Елордада алғаш қар жауған күннен бастап қаланың коммуналдық қызметі күшейтілген режимде жұмыс істеп келеді. Қазіргі уақытта қар күреу жұмысы тәулік бойы жүргізіліп жатыр, деп хабарлайды елорда әкімдігінің ресми сайты.

Өткен түнде қар полигондарына 2 565 ауыр жүк көлігінің рейсімен елордадан 42 418 текше метр қар мен мұз шығарылды.

18 ақпан күні таңертеңнен бастап қаланы қар мен мұздан тазарту жұмысына 1 610 арнайы техника мен 3 076 жол жұмысшысы жұмылдырылды. Ең алдымен негізгі көшелер мен қоғамдық көлік жүретін бағыттар тазартылады. Одан кейін қозғалыс қарқыны орташа аумақтарда – аулаларда, алаңдарда, тротуарлар мен аялдамаларда тазалау жұмысы жүргізіледі.

Жалпы, қыс мезгілі басталғалы бері қаладан қар полигондарына 363 201 рейспен 5 млн 346 мың 042 текше метр қар шығарылған. Қала тұрғындарының қауіпсіз қозғалысын қамтамасыз ету үшін жолдар, тротуарлар мен көшелерге техникалық тұз себілуде. Бұл жұмыстар да тәулік бойы атқарылып жатыр.

Астана қаласының әкімдігі қала тұрғындары мен қонақтарын қауіпсіздік ережелерін сақтауға, жолдар мен тротуарларда барынша сақ болуға, сондай-ақ қолайсыз ауа райы жағдайында алыс жолға шықпауға шақырады.

Бұған дейін Астанада Түркі әлемінің балалар ойындары халықаралық фестивалі өтіп жатқанын хабарлаған едік.