«Ломбардқа қарақшылық жасамақ болған адам ғимараттан шығарылды. Қазіргі кезде тиісті шаралардың аясында оны тергеу амалдары жүріп жатыр», - деді С. Қылышбекова.
Нақтыланған мәліметтер бойынша, күдікті 1974 жылғы Астана тұрғыны. Операция жүргізу барысында ұсталған адамнан пневматикалық қару тәркіленіп, баллистикалық сараптамаға жіберілді.
Аталған ломбардтың екі қызметкері аман-есен босатылды. Атап айтқанда, 2,5 сағат келіссөздер жүргізіліп, күдікті полицияға қарсылық көрсеткен жоқ. Жалпы ешкім де зардап шекпеді.
Оның сөзіне қарағанда,ломбардқа мүліктік зақым келген жоқ. Күдіктімен арадағы келіссөздер телефон арқылы жүргізілген көрінеді.
Еске сала кетейік, бүгін Кенесары көшесінде «Спутник» дүкені ауданында орналасқан «М-Ломбардты» тонауға әрекет жасалды. Ішке басып кіру кезінде дабыл тетігі іске қосылып, есік автоматты түрде құлыпталып, іште күдікті және екі ломбард қызметкері қамалып қалды. Аталған ломбардта күзетші болмаған, яғни ғимараттың дабыл белгісі қашықтан күзет фирмасына қосылған екен.
Жедел іс-шараларға қаланың барлық шұғыл қызметтері тартылды. Шара ішкі істер министрінің бірінші орынбасары Марат Демеуовтің басшылығымен жүргізілді. Қарақшы арнайы қызметтер жауынгерлері ғимараттың ішіне кіргеннен кейін ұсталды.
Қазіргі кезде ҚР ҚК-нің 192 бабы - "Қарақшылық" және ҚК-тің 261-бабы - "Кепілге алу" бойынша сот алдындағы тергеу жүріп жатыр. Тиісті сараптамалар тағайындалды. Тергеу амалдары жүргізілуде.