Астанада медицина мамандары сәулелік терапияның заманауи жоғары технологияларын қолдануды үйренуде
Іс-шараға еліміздің барлық бейінді емдеу мекемелерінен сәулелік терапия саласының мамандары қатысуда.
Конференция барысында АҚШ, Швейцария, Латвияның жоғары білікті сарапшылары баяндама жасауда. Сондай-ақ жұмыс қондырғыларында дозиметриялық жоспарлау бойынша тәжірибелік сабақтар ұйымдастырылып, түрлі оқшауларда орналасқан ісіктерді сәулелендіруді жоспарлаудың бірнеше клиникалық амалдары қарастырылады. Конференцияға шақырылған дәріскерлер жергілікті мамандармен тәжірибелерімен және білімдерімен бөлісіп, нақты клиникалық мысалдарды талқылауда. Конференцияның басты мақсаты - мемлекет сатып алған сәулелік терапияның заманауи жоғары технологиялық қондырғыларын қолдануға республиканың медициналық мамандарын оқытып, үйрету. Астана, Алматы, Ақтөбе және Семейдің емдеу мекемелеріне сатып алынған жоғары технологиялық желілік үдеткіштер екі өлшемдіден үш өлшемді сәулелік терапияға көшуге, сауығып кететін онкологиялық науқастар санын арттыруға және көптеген науқастардың өмір жасын ұзартуға мүмкіндік береді. Жоғары технологиялық желілік үдеткіштерді қолдану арқасында онкологиялық науқастар үшін ісіктің дәл ошағын барынша сәулелендіруге және айналасындағы басқа органдар мен тіндерге түсетін жүктемені азайтуға мүмкіндік беретін заманауи емдеу тәсілдері қолжетімді болады. Еске сала кетейік, 2015 жылғы 1 қаңтардағы жағдай бойынша, 150 мыңнан астам қазақстандық онкологиялық есепте тұр. Мұндай науқастар санының артуына обыр дертіне шалдыққандарды ерте кезеңде анықтау себеп болуда. 17 мыңға жуық адам жыл сайын обырдан қайтыс болады. Онкологиялық ауруларды ерте анықтау, олардың диагностикасы, емдеу және оңалту шаралары 2011-2015 жылдарға арналған «Саламатты Қазақстан» мемлекеттік бағдарламасының басты бағыттарының бірі.