Витрукпен жекпе-жекке шығуға өзі келісім берген, келісім шартқа өз қолымен қол қойған, Қазақстанға өз еркімен келген Ромеро барлық спортшылардың аренаға шығуына 10 минут қалғанда жоқ болып кетті. Қонақүйден шығып, бапкерлерден жасырынып, телефонын да өшіріп тастапты.
Бейтаныс елде адасып кеткен шығар деген қауіппен спортшыны іздеуге бірден полиция кірісті. Бірақ одан да дым шықпады. Бапкері Испаниядағы туған-туыстарына да хабарласты, бірақ ол жақтағылар да бейхабар. Әйтеуір түнгі үштер шамасында ол әуежайдан табылды. Онда жаяу жетіп, сол жерден Испанияға ұшып кетпек болған екен. Алайда өзінің бұл қылығын ауыр психологиялық жағдайда тұрған спортшы түсіндіре алмады. Испандық команданың бапкері мұндай жағдайға бірінші рет тап болып тұрғанын айтты. M-1 Global компаниясы қызу төбелес ұйымдастыру үшін бар күшін салды, алайда Ресейде екі мәрте жеңіске жеткен Ромеро бұл жолы төбелеске шығар алдында қашып кететінін кім біліпті.