«Үлкендердің қарауынсыз қалған бала Есіл өзенінің жағасында ойнап жүргенде абайсызда суға түсіп кетіп, өздігінен шыға алмаған. Сол маңдағы адамдар оны байқап қалып, баланы құтқарған. Біздегі дерек бойынша, бала 5-6 жас шамасында», - дейді Р. Иманқұлов ҚазАқпарат тілшісіне телефон арқылы берген сұхбатында.
Оның айтуынша, кішкентай баланы инкассатор Арман Смағұлов, студенттер - Ангелина Дәрменбаева және Тимур Насибуллиндер құтқарған.
ТЖК өкілдері олармен байланысып үлгерген.
«Біз үзбей байланыс жасап отырмыз, жуық арада баланың өмірін сақтап қалған азаматтарды марапаттаймыз. Қазір оқиғаның толық мән-жайын білу және оған қатысқандардың бәрін атап өту үшін сол құтқарылған баланың өзін іздеп жатырмыз», - дейді Р. Иманқұлов.
Еске сала кетейік, кеше Астанада суға батып бара жатқан баланы белгісіз адамдардың құтқарып алғаны туралы хабарлаған болатынбыз.