Астанада жарты күнде жауын-шашынның айлық мөлшері жауды (ФОТО)

АСТАНА. ҚазАқпарат - Кеше Астана қаласында толассыз жауған жаңбыр салдарынан бірқатар көшелерде көлік қозғалысы шектелді. Бірнеше сағат бойы тоқтаусыз жауған жауын-шашынның әсерінен кейбір көшелерде көлік кептелісі пайда болды.

Атап айтқанда, Б. Момышұлы даңғылынан Дарабоз көшесіне дейін: Оқушылар сарайының жанында, А. Байтұрсынов көшесі мен Тәуелсіздік даңғылының қиылысында көлік қозғалысы тоқтатылды.

Жол-патрульдік полиция қызметкерлері көлік ағымын реттеуде, - деп хабарлайды Астана қаласының ІІД баспасөз қызметі.

Табиғат жағдайына байланысты елордалық коммуналдық қызметтер күшейтілген режимде жұмыс істеуде. Астана қаласы Коммуналдық шаруашылық басқармасының хабарлауынша, елорданың үш ауданында жиналған суды сору үшін 60 мамандандырылған техника тартылған. Атап айтқанда, арнайы илососты, вакуумды көліктер мен су сору құрылғысы бар МТЗ-82 тракторлары.

Қазіргі уақытқа дейін бірінші ауысымда қызмет еткен коммуналдық жұмысшылар 2609 м3 жаңбыр суын сорып үлгерді: «Алматы» ауданында 970 м3, «Есіл» ауданында 789 м3, «Сарыарқа» ауданында 850 м3.

«Қазгидромет» РМК болжамынша, Астанада алдағы күндері ауа райы жауын-шашынды болады.

17 мамырда күн ала бұлтты, түнде және таңертең жаңбыр жауып, күн күркірейді. Батыстан соққан желдің жылдамдығы 9-14 м/с, кей жерлерде 15-20 м/с дейін күшейеді. Ауа температурасы түнде +8+10°С , күндіз +18+20°С болады.

Дүйсенбі күні, 18 мамырда өткінші жаңбыр жауып, ауа температурасы түнде +8+10°С, күндіз +18+20°С болады.

Сейсенбі, 19 мамыр күні де ауа райы жауын-шашынды болады, оңтүстік-батыстан соққан желдің жылдамдығы 9-14 м/с жетеді. Түнде ауа температурасы +10+12°С, күндіз +19+21°С дейін жылынады, деп хабарлайды astana.kz. Мұхтар Холдорбековтың фотосы