Астанада ЖОО қызметкері грантқа түсіріп беремін деген желеумен 3 млн теңге иемденген

АСТАНА. KAZINFORM – Астанада студенттер мен олардың ата-аналарын алдап, грантқа ауыстыру жөнінде уәде беріп, ақшаларын иемденген бұрынғы ЖОО қызметкері сотталды. Бұл туралы Бас прокуратура мәлім етті.  

— Түлектерді жұмыспен қамтуға жәрдемдесу секторында жұмыс істей отырып, ол студенттер мен олардың ата-аналарын академиялық үлгерім, грантқа ауыстыру және стипендияны қайтару мәселелерін «шешіп» бере алатынына сендірген. 2023-2024 жылдар аралығында ол алаяқтық жолмен 3 млн теңгеден астам қаржыны иемденгені анықталды. Оның әрекетінен 15 адам зардап шеккен, — делінген прокуратура хабарламасында.

Мемлекеттік айыптаушы оның кінәсін толық дәлелдеді.

Жәбірленушілерге келтірілген шығын өтелді.

Кінәсін мойындап, залалды өтеуі және кәмелетке толмаған балаларының болуы ескеріліп, ол 3 жылға бас бостандығын шектеу жазасына сотталып, тағайындалған мерзімге пробациялық бақылау белгіленді.

Үкім заңды күшіне енді.

Еске сала кетейік, бұған дейін адам саудасына қатысты 40 қылмыс анықталғанын жазған болатынбыз.