Қауымдастық президенті Исламбек Салжанов Мемлекет басшысы Қасым-Жомарт Тоқаевтың ұлттық спорт түрлерін дамытуға әрқашан шынайы ықылас танытып, айрықша қолдау көрсетіп отырғанын атап өтті.
Сонымен қатар ұлттық спорттың кең насихатталуына БАҚ өкілдерінің сіңірген еңбегіне тоқталды.
- Ұлттық спорт түрлері осы уақытқа дейін қарқынды даму үстінде. Қауымдастық екі жылда ұлы құндылықтарды ұлықтау ісінде аянып қалған жоқ. Түрлі республикалық және халықаралық жарыстар мен 5-ші Дүниежүзілік көшпенділер ойындары ұлттық спорттың абыройын одан әрі биіктете түсті. Осы орайда халыққа ақпарат таратып, ұлттық спорттың қыр-сырын насихаттаған БАҚ өкілдеріне алғысымды айтамын, - деді ол.
АLAMAN халықаралық медиа байқауына 200-ден аса материал келіп түсті.
Қазылар алқасы келіп түскен материалдарды жіті қарап, тиісті қорытынды шығарды.
Бұл ретте бірінші орынды Kazinform ақпарат агенттігінің Түркістан облысындағы фотоақпарат қызметінің фототілшісі Мақсат Шағырбай жеңіп алды.
Бұған дейін Отандастар қоры «Ұлы Дала» халықаралық кітап шығару байқауын жариялағанын жаздық.