Қыстың алғаш күнінде Астана қаласының полиция және төтенше жағдайлар департаменттерінің қызметкерлері Amanat партиясының еріктілерімен бірге Алматы ауданындағы жеке тұрғын үй массивін, жатақханалар мен хостелдерді, барак типіндегі жалдамалы баспаналарды, саяжай секторын аралап, өрт қауіпсіздігі жөнінде түсіндіру жұмыстарын жүргізді.
Төтенше жағдайлар департаментінің дерегі бойынша, бүгінгі таңда Астана қаласы бойынша ресми түрде 229 қонақ үй мен 80 хостел жұмыс істейді.
«Бүгін Алматы ауданындағы 20 хостелді араладық. Негізі Астана қаласы әкімдігінің ресми мәліметі бойынша, қалада 80 хостел бар. Жалпы қалада жалға берілетін үй өте көп. Сондықтан біз полициямен бірлесіп, осындай шаралар өткіземіз», - дейді Астана қаласы төтенше жағдайлар департаменті мемлекеттік өрт бақылау басқармасы бастығының міндетін атқарушы Мадияр Мырзагелдиев.
Оның сөзінше, жылыту маусымы басталғаннан бері «Жатақхана» жедел-алдын алу іс-шарасы аясында баспана ретінде жалға берілген 257 нысанды аралау жұмыстары жүргізілген.
Жалпы жыл басынан бері Астана қаласының аумағында 549 өрт тіркелген. Оның ішінде тұрғын үй секторында 223 өрт болған. Тұрғын үй секторындағы өрттерден жыл басынан бері 12 адам қаза тапқан. 27 адам түрлі дәрежедегі жарақаттар алса, 38 адам түтінге уланған.
Аула аралау кезінде полиция өкілдері мен төтенше жағдай қызметінің мамандары жатақхана және басқа да коммерциялық қызмет үшін пайдаланылатын тұрғын үйлерге ерекше назар аударды.