Астанадағы турнирде Қазақстан хоккей құрамасы Ресейден жеңілді
АСТАНА. KAZINFORM — Шайбалы хоккейден Қазақстан ұлттық құрамасы бүгін, 1 мамырда халықаралық Qazaqstan Hockey Open турниріндегі алғашқы ойынын Ресей 25 құрамасына қарсы өткізді.
Бас бапкер Олег Болякин аталған кездесуге төмендегі қазақстандық хоккейшілерді шығарды: Кудрявцев (Әмірбеков); Орехов-Метальников, Михайлис-Шестаков-Колесников; Бекетаев-Данияр, Панюков-Лихотников-Әсетов; Михайлов-Гайтамиров, Рымарев-Өмірбеков-Савицкий; Бреус-Волков, Қайыржан-Мұхаметов-Мұратов.
Кездесу барысында ресейлік хоккейшілердің басымдығы байқалып тұрды. Олардың қатарынан Данил Аймұрзин, Дмитрий Саморуков, Марат Хайруллин және Михаил Воробьев гол соқты.
Қазақстан құрамасынан Әлихан Әсетов бір голмен жауап қайырды.
Осылайша ел құрамасы қарсыласына 1:4 есебімен есе жіберді.
Енді ел құрамасы 3 мамырда Беларусьпен шеберлік байқасады. Ертең, 2 мамырда Ресей 25 құрамасы мен Беларусь ойнайды.
Халықаралық турнирге қатысушылар топтық жүйе бойынша сайысқа түседі. Көп ұпай жинаған құрама турнирдің жеңімпазы атанады.
Бұл Қазақстан құрамасының 2025 жылғы әлем чемпионаты алдындағы дайындығы аясында өткізіліп жатыр.
Қазақстандық хоккейшілер В тобында ойнайды. Қарсыластары — Финляндия, Чехия, АҚШ, Германия, Дания, Норвегия және Венгрия. Ойындар Данияның Хернинг қаласында болады.
Ал Швецияның Стокгольм қаласында болатын А тобында Канада, Швеция, Швейцария, Словакия, Латвия, Австрия, Франция және Словения шеберлік байқасады.