Астанадағы Ұлттық спорт университетінің құрылысы қашан аяқталады

АСТАНА. KAZINFORM — Астанада салынып жатқан Ұлттық спорт университетінің құрылысы биыл жыл соңына дейін толық аяқталады. Нысан спорт саласындағы ең ірі инфрақұрылымдық жобалардың бірі болып есептеледі және көпфункционалды кешен ретінде іске қосылады.

Құрылыс барысымен Премьер-министрдің бірінші орынбасары Роман Скляр танысты. 

Делегация құрамында Туризм және спорт министрі Ербол Мырзабосынов және мердігер компания өкілдері болды. Оқу орны Мемлекет басшысының спорт инфрақұрылымын дамыту жөніндегі тапсырмалары аясында салынуда.

- Бүгінгі таңда құрылыс-монтаж жұмыстары толық аяқталып, нысанның бір бөлігі пайдалануға берілді. Бірінші кезең аясында колледждің оқу ғимараты, 500 орындық жатақхана, трибунаның астындағы үй-жайлар, жабық жеңіл атлетикалық манеж, бассейн және көпфункционалды кешен қарастырылған, - деп жазды Туризм және спорт министрлігінен.

Екінші кезеңде ғылыми-зерттеу орталығы бар университет ғимараты, 1 000 орындық жатақхана, медициналық-сауықтыру орталығы, оқытушыларға арналған тұрғын үй корпусы және стадионды пайдалануға беру жоспарланған. Құрылыс жұмыстарының аяқталуы биылғы жылға межеленген.

Тексеру қорытындысы бойынша вице-премьер спорт нысанына инженерлік-коммуникациялық инфрақұрылым мен жеткізу желілерін уақытылы тарту жөнінде тиісті тапсырмалар берді.

Айта кетейік, елімізде алкогольсіз сусындар шығаратын зауыттың құрылысы басталды.