Гранттарды елорда басшысының орынбасары Аида Балаева табыстады.
Оның атап көрсеткеніндей, Астана қаласы әкімінің білім гранттары 2004 жылдан бастап, әлеуметтік көмекке аса зәру - тұл жетімдерге, туа біткен мүгедектерге, балалар үйлерінің тәрбиеленушілеріне, көп балалы отбасылар мен ата-анасының қамқорлығынсыз қалған балаларға беріліп келеді.
«Осы уақытқа дейін мұндай гранттар 253 балаға берілді. Олардың 105-і жоғары оқу орындарын тәмамдап, экономиканың түрлі салаларында қызмет етіп жүр», - дейді А. Балаева.
Ағымдағы жылы осы мақсатта қала бюджетінен 41,4 миллион теңге бөлінген. Әкімнің гранттары елорданың еңбек нарығына барынша қажетті - техникалық, педагогикалық және медициналық мамандықтар бойынша Л.Гумилев атындағы Еуразия Ұлттық университетіне, С.Сейфуллин атындағы Қазақ агротехникалық университетіне бағытталды.