Астананың БҚО-дағы күндері: Елордалықтар ірі кәсіпорындармен танысты
Өңіраралық ынтымақтастықты нығайта түсу мақсатында Астана қаласы әкімінің орынбасары Ермек Аманшаев бастаған делегация өңірдегі іргелі кәсіпорын «Орал сауда-өнеркәсіп компаниясы» ЖШС-да болды. Кәсіпорын металл жабыны, профлист, сондай-ақ газ, су, кәрізге арналған диаметрі 20-дан 1600 миллиметрге дейінгі полиэтилен, полипропилен құбырларын шығарады. Неміс жабдығымен жұмыс жасайтын компания, әсіресе, Қазақстанда алғашқы болып диаметрі 1600 мм полиэтилен құбырларын шығарды.
Астана қаласы инвестициялар және даму басқармасы басшысының орынбасары Ерлан Бекмұрзаев өздері болған оралдық кәсіпорындардың бәрі де қазіргі заманғы талаптарға сай келетінін жеткізді. Олардың бірқатары Астана құрылысына, соның ішінде «ЭКСПО-2017» қалашығын тұрғызуға қатысқаны белгілі.
Еске сала кетейік, елорданың 20 жылдығына арналған Астана қаласының Батыс Қазақстан облысындағы күндері ертең мәреге жетеді.