Триумфалды қақпа жақта тұратын бір тұрғын әйел жаңа аялдама орнатып, мектеп оқушыларының оқу орнына және спорт кешендеріне алаңсыз қатынауын шешіп беруін өтінді.
Ермағанбет Бөлекпаев бұл мәселенің өзекті екенін алға тарта келе, осы жылы 65 аялдама кешенін орнатуды жоспарлап отырғандарын хабарлады.
Әкімнің мәліметінше, өткен жылы 84 жаңа автобус пайдалануға босатылған, алдағы уақытта тағы да 170 қоғамдық көлік босату жоспарлануда. Тұрғындардың бірнеше мәрте шағымдануына байланысты № 47, 54, 100, 107, 301 жаңа маршруттар қосылды. № 12 бағдардың жүрісіне өзгерістер енгізілді. «Есіл» ауданында 270 аялдама бар, қосымша 65 орнатылмақ.
Естеріңізге сала кетейік, «Есіл» ауданының әкімі Ермағанбет Бөлекпаевтың халықпен кездесуі 19 қаңтар күні басталды және 27 қаңтарға дейін жалғаспақ. Осы уақыт аралығында 8 кездесу болады, онда аудан басшысы денсаулық сақтау мекемелерінің медицина қызметкерлерімен, тұрғын үй алаптарын қоса алғанда аудан халқымен кездеседі.