- 2014 жылғы 11 қарашадағы «Нұрлы жол - болашаққа бастар жол» Қазақстан халқына Жолдауында айтылған Мемлекет басшысының тапсырмасына сәйкес, әкімдік мүдделі мемлекеттік органмен бірлесіп, Астана халықаралық әуежайының ұшып-қону жолағын қайта жөндеу кезінде жаңа терминал салу мәселесін пысықтады. Осы мақсатта жалпы ауданы 347,60 гектар жер бөлінбек, онда тексеру, тиісті нысандар құрылысын жобалау жұмыстары жүргізілді. Бұл ретте әуежай аумағын, оның қорғалатын аймақтарын кеңейту, аталған аумақтарды су басуды болдырмау бойынша кешенді шаралар жүргізу қажеттілігі туындайды. Алайда, Ақмола облысы Целиноград ауданындағы Майбалық көлінің жанында қалаға іргелес жатқан жалпы ауданы 7300 гектар қосымша жерді Астананың аумағына қосып алмастан, бұл шараларды іске асыру мүмкін емес, - деді Астана қаласының жер қатынастары басқармасының басшысы Төлеуғазы Нұркенов өз баяндамасында.
Сонымен қатар, Басқарма басшысы аумақтың бір бөлігінде елорда тұрғындары мен қонақтарының демалуына арналған аймақ құруды ұсынды.
Астананың әкімшілік шекарасын өзгерту аясында Қабанбай батыр және Талапкер ауылдық округтерінде орналасқан жалпы ауданы 1419 гектар жерді қалаға беру ұсынылды. Бұл жерлер Мемлекет басшысының ҚР ұлттық пантеонын, сондай-ақ жаңа қалалық зират салу бойынша тапсырмасын орындауды қамтамасыз ету үшін қажет. Т. Нұркеновтың айтуынша, зират Көкшетау тасжолының бойында МАИ бекетінен кейін орналаспақ.
Аталған жоба Қоғамдық кеңес мүшелерімен бірауыздан бекітілді.
Қазіргі кезде бұл жерлер аталған нысандарды жобалау және салу үшін Астана қаласының коммуналдық шаруашылық басқармасына тұрақты жер пайдалану құқығына берілді.