деп хабарлады ҚР Мәдениет министрлігінің баспасөз қызметінен.
Ведомствоның атап өтуінше, кесененің ашылу салтанатына Атырау облысының әкімі Бергей Рысқалиев, Астрахан облысының губернаторы Александр Жилкин, ҚР-ның РФ-дағы Төтенше және Өкілетті Елшісі Зауытбек Тұрысбеков, ҚР Мәдениет вице-министрі Ғазиз Телебаев қатысты.
Шара барысында сөз алған мәдениет вице-министрі: «Біздіңше, Бөкей хан бөтен елде емес, бір кездері өзі қолымен құрған іргелі орданың қасиетті жерінде, қалың қазақтың ортасында жатыр. Оның үстіне, ел аузындағы дерек бойынша, Бөкей хан өзін нақ осы жерге - Сейіт бабаның жанына жерлеуді аманат етіпті. Міне, сондықтан да өткен жылғы қыркүйекте Қазақстанның Ресейдегі Төтенше және Өкілетті елшісі Зауытбек Тұрысбеков Елбасымыз Нұрсұлтан Назарбаевтың тапсырмасымен Астрахан облысында іссапарда болып, облыс губернаторы А.Жилкинмен кездесуі барысында Бөкей хандай ұлы бабаның басына көрнекті кесене тұрғызу жөнінде уағдаластыққа қол жеткізілді», - деп атап өтті.
Оның айтуынша, өңірдегі елжанды азаматтардың алға қойған бұл сауапты ісі облыс әкімі Бергей Рысқалиев тарапынан қолдау тапты. Бөкей хан кесенесін тұрғызуға елеулі қаржылай көмек көрсетіп, атқарылатын жұмыстарды өзара бөлісіп, іске білек түре кіріскен меценаттар тобы құрамында Сенат депутаты Сәрсенбай Еңсегенов, Мәжіліс депутаты Болат Қонарбай, атыраулық белгілі кәсіпкерлер Аманжан Рысқали, Амангелді Баракатов, Әбдібек Бисенов, Орынғали Әлдекенов, Мұрат Жәкібаев, Әділ Жұманов сынды нағыз отаншыл, елжанды ағайындар болғанын бүгін аса ілтипатпен атауға болады.
«Жұртшылықтың ықылас-ниетіне қарай Бөкей хан кесенесін көтеру арқылы біз екі ел арасындағы достық байланыстарды бұрынғыдан да биіктете түскенімізді сезіндік. Өйткені көп ұзамай бұл аймақ зиярат етушілердің, басқа да туристердің ізгілік жолына айналады. Сейіт бабаның, Бөкей ханның рухына тағзым ете келген зияратшы қауым Алтынжардағы Құрманғазы кесенесіне қайырылатыны, облыс орталығындағы Құрманғазы ескерткішіне баратыны, сөйтіп екі елге де тиімді жаңа туристік маршрут ашылатыны сөзсіз», - деп атап көрсетті Ғ.Телебай.