Атырау облысына сәуір айына 7,4 мың тонна сұйытылған мұнай газы бөлінді

АТЫРАУ. KAZINFORM – Атырау облысына сәуір айында 7 мың 429 тонна сұйытылған мұнай газы жеткізіледі. 

Атырау облыстық энергетика және тұрғын үй-коммуналдық шаруашылық басқармасының басшысы Айдулат Кенжебековтің мәліметінше, Энергетика министрлігінен тағы да 2 мың тонна сұйытылған мұнай газын сұрау көзделіп отыр.

– Атырау облысының ішкі нарығына сәуір айына 7 мың 429 тонна сұйытылған мұнай газы бөлінді. Ішкі нарықтағы газ қажеттілігін қамтамасыз ету үшін Министрліктен қосымша 2 000 тонна сұйытылған мұнай газы көлемі сұралады. Қазір Атырау қаласы мен аудандарда орналасқан бекеттерге сұйытылған мұнай газының аталған көлемін тарату жүріп жатыр, - деп хабарлады Айдулат Кенжебеков. 

Оның айтуына қарағанда, өңірде 101 автогаз құю бекеті бар. Қазір сұйытылған мұнай газының жеткілікті қоры жасақталған. Сұйытылған газ тапшылығы туындамайды.

Еске сала кетелік, бұған дейін Атырауда сұйытылған мұнай газын сақтайтын компания негізсіз кіріс тапқанын жазған едік.