Биыл бірінші сыныпқа құжат қабылдау науқаны 18–28 маусым аралығында өтті. Осы кезеңде өңір бойынша барлығы 9 981 өтініш тіркелген.
Оның ішінде 5 959 өтініш электронды OQU платформасы арқылы eGov порталына жолданса, 4 022-сі қағаз жүзінде қабылданған.
Өтініштерді қарау барысында талаптарға сәйкес келмеген 3 810 құжат түзету үшін кері қайтарылды. Қазіргі уақытта 6 171 баланың құжаттары мақұлданған. Оның ішінде 4 139 оқушы қазақ тілінде білім беретін сыныптарға, ал 2 032 оқушы орыс тілінде оқытатын сыныптарға қабылданды.
Облыстық білім беру басқармасының бөлім басшысы Айнагүл Жұмағазиеваның айтуынша, ата-аналар құжаттарды тапсыру кезінде олардың толық әрі қолданыстағы талаптарға сәйкес рәсімделуіне ерекше назар аударуы қажет.
— Құжаттардың толық әрі дұрыс рәсімделуі өтінішті қарау мерзімін қысқартып, қабылдау процесінің сапалы әрі жедел жүргізілуіне мүмкіндік береді. Сондықтан ата-аналардан құжаттарды тапсырар алдында олардың талаптарға сәйкестігін мұқият тексеруді сұраймыз, — деді Айнагүл Жұмағазиева.
Айта кетейік, бірінші сыныпқа құжат қабылдау 31 тамызға дейін жалғасады.
Бұған дейін колледждерде құжат қабылдау 25 маусымда басталатынын жазған едік.