АТЫРАУ. KAZINFORM — Махамбет ауданындағы Атырау – Орал және Атырау – Индер автомобиль жолдарын байланыстыратын көпірде ауыр жүк көліктерінің қозғалысына уақытша шектеу енгізіледі. Бұған көпірде жүргізіліп жатқан орташа жөндеу жұмыстары себеп болған.
Аудан әкімдігінің хабарлауынша, шектеу 2026 жылғы 5 қарашадан бастап 20 күнге енгізілді. Осы кезеңде ауыр жүк көліктерінің барлық түріне көпір арқылы жүруге рұқсат берілмейді.
Жүргізушілерге сапарларын алдын ала жоспарлап, балама бағыттарды қарастыру ұсынылды.
Айта кетейік, Жайық өзенінің үстіне салынған көпір 2018 жылы пайдалануға берілген.
Еске салайық, иыл ғана орташа жөндеуден өткен Атырау қаласындағы орталық көпірдің деформациялық тігістерін ауыстыру жұмысы келер жылға қалды.
Нұрбибі Теміртасова
Х. Досмұхамедов атындағы Атырау университетінде «Журналистика және ақпарат» мамандығы бойынша білім алған. Медиа саласындағы жұмыс өтілі 5 жылдан асады. 2025 жылдың желтоқсан айынан бері Kazinform агенттігінің Атыраудағы тілшісі.