ПАВЛОДАР. KAZINFORM - Павлодар қаласында волейболдан ерлердің ұлттық лига командалары арасында Қазақстан чемпионаты екінші турының соңғы ойындары өтіп жатыр.
Бүгін алаңға алғашқы болып «Атырау» мен «Есіл» (СҚО) командалары шықты.
Осыған дейін сербиялық Деян Вуличевич жаттықтыратын атыраулықтар қатарынан екі матчта жеңіске жетсе, Алексей Терениннің шәкірттеріне де ұпай ауадай қажет еді.
Бұл ойында да «Атырау» қарқынын бәсеңдеткен жоқ – 3:0 (25:22, 25:17, 25:22).
Осылайша, 13 ұпай жинаған атыраулықтар турнир кестесінде 7-орынға көтеріліп, «Есіл» (11 ұпай) 8-сатыға түсіп қалды.
«Атыраудан» Төлеби Әлімбек, «Есілден» бүгінгі бәсекеге қатыспаған команда капитаны Александр Сулейманов екінші турдың үздік ойыншысы атанды.
Еске сала кетейік, бұдан бұрын волейболдан ел чемпионатында «Ақтөбенің» вице-чемпионды тізе бүктіргенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).