Атырауда 40 жастағы тұрғыннан 16 келі қарасора тәркіленді

АТЫРАУ. KAZINFORM – Атыраудың 40 жастағы тұрғыны 16 келі қарасорамен ұсталды. 

Атырау облыстық полиция департаментінің баспасөз қызметінен мәлім еткендей, есірткі қылмысына қарсы іс-қимыл басқармасының қызметкерлері 40 жастағы күдіктінің қарасора өсіріп, кептірілген өсімдікті сақтағанын анықтады. 

– Күдіктінің тұрғылықты мекенжайын тінту кезінде 45 дана есірткіні, тоңазытқышта сақталған ерекше иісі бар кептірілген өсімдікті тапты. Тәркіленіп алынған заттар салмағы 16 келіден асатын қарасора екені анықталды, - деп хабарлады департаменттің баспасөз қызметі. 

Қазір ұсталған күдіктіге қатысты ҚР Қылмыстық кодексінің 300-бабының 3-бөлігімен қызмыстық іс тіркелді. Сотқа дейінгі тергеп-тексеру амалдары жүріп жатыр. 

Еске сала кетелік, бұған дейін Атырауда есірткі өсіруге арналған фитозертхана анықталғаны хабарланған еді.