Атырауда 9 жастағы жасөспірімді ұрып-соғу дерегі бойынша қылмыстық іс тіркелді

АТЫРАУ. KAZINFORM – Атырау қаласындағы аулалардың бірінде 9 жастағы жасөспірімге қатысты жасалған зорлық-зомбылық фактісі бойынша қылмыстық іс қозғалды. Бұл туралы облыстық полиция департаменті хабарлады. 

Ведомствоның мәліметінше, аталған оқиға бойынша 21 жастағы күдікті анықталып, қамауға алынды.

– Жәбірленуші жеңіл дене жарақатын алған. Қазіргі уақытта оған психологиялық көмек көрсетіліп жатыр. Өзге ақпарат тергеу мүддесіне байланысты жариялауға жатпайды, - делінген Полиция департаментінің ресми хабарламасында. 

Сонымен қатар жәберленуші жедел жәрдем бригадасымен Атырау облыстық балалар ауруханасының травмпунктіне жеткізілген.

– Пациенттің шағымдары: бас айналу, сол жақ көз маңындағы ауырсыну. Жарақат ер адамның соққысынан кейін пайда болғаны белгілі болды, – деп хабарлады облыстық денсаулық сақтау басқармасы.

Дәрігерлер науқасқа компьютерлік томография жасап, бас сүйек-ми құрылымдарында өзгеріс анықтамаған. Қорытынды бойынша, балада сол жақ көз маңындағы жұмсақ тіндердің соғылуы тіркелген.

Еске сала кетейік, бұған дейін елімізде қылмыс саны 13%-ға төмендегенін жазған болатынбыз. Оның ішінде Қазақстанда кісі өлтіру, қарақшылық, тонау, бұзақылық, ұрлық және мал ұрлығы азайған.