Кәсіпорынның мәліметінше, тұрғындар арасында құрылыс және ірі көлемді қалдықтарды арнайы полигондарға апармай, көпқабатты үйлердің маңындағы контейнерлерге тастау деректері кездеседі. Сондай-ақ қоқыс шығару қызметінің ақысын уақытында төлемейтіндер де бар. «Арнаулы автобаза» ЖШС абоненттік бөлімінің басшысы Ғалия Есқалиеваның айтуынша, алдымен борышкерлерге ескерту жасалады.
– Қызметкерлер күн сайын тұрғындармен байланысып, телефон арқылы хабарласады, ескерту жасап, тиісті құжаттарды жолдайды. Егер белгіленген мерзімде төлем жасалмаса, материалдар Қазақстан Республикасының заңнамасына сәйкес жеке сот орындаушыларына беріледі, – деді ол.
Кәсіпорын мәліметіне сәйкес, тәулігіне орта есеппен 200-300 тонна тұрмыстық қатты қалдық шығарылады. Жаз мезгілінде бұл көлем 600 тоннаға дейін ұлғаяды. Оның шамамен 200 тоннасы полигонда көміледі, 100 тоннасы қоқыс сұрыптау кешеніне жеткізіледі. Ал сұрыпталған қалдықтың 6 пайызы ғана қайта өңделеді.
Қазір қалада 25 қоқыс таситын арнайы техника жұмыс істейді. Биыл автопарк JAC маркалы 7 жаңа көлікпен толықтырылған. Жалпы шаһар ішінде 5600 қоқыс контейнері орнатылған.
Бұған дейін өңірде заңсыз қоқыс үйінділері үшін 7 әкім жауапқа тартылғанын жазған едік.