Облыстық полиция департаменті баспасөз қызметінің ақпаратына қарағанда, қарақшылық шабуыл 3 желтоқсанда болған.
«Күдікті таңертеңгі сағат 08:55 шамасында букмекерлік кеңсе бетперде киіп кірген. Кеңсе қызметкерін ас үй пышағымен қорқытқан. Сөйтіп, күдікті букмекерлік мекемеден 143 мың 780 теңгені алып, оқиға орнынан бой тасалап, қашып кеткен», - деп хабарлады департаменттің баспасөз қызметінен.
Полиция қызметкерлері күдікті ретінде Атырау қаласының 25 жастағы тұрғынын ұстады. Күдіктіге қатысты ҚР Қылмыстық кодексінің 192-бабының 2-бөлігімен (Қарақшылық) қылмыстық іс қозғалды. Тергеп-тексеру жүріп жатыр. Қазір ұсталған күдікті уақытша ұстау изоляторына қамауға алынды.
Еске сала кетелік, бұдан бұрын Атырауда микроқаржы кеңсесіне қарақшылық жасаған күдікті ұсталғанын жазған болатынбыз.