Атыраудағы қамыс өрті: Ауада ластаушы заттар шекті мөлшерден асқан
АТЫРАУ. KAZINFORM – Атырау облысында 8 қазаннан бері Каспий теңізінің жағалауында қамыс өртеніп жатыр. Қамыс өртіне соңғы екі күнде тікұшақпен 61 тонна су төгілген.
Атырау облыстық төтенше жағдайлар департаменті мемлекеттік өрт бақылау басқармасының бастығы, азаматтық қорғау подполковнигі Бағдат Абдуллиннің айтуынша, қамыс өртін сөндіру әлі жалғасып жатыр.
«Каспий теңізінің жағалауындағы қамыс өртінің алғашқысы 7 қазанда анықталды. Өрт Құрманғазы ауданындағы Құрманғазы ауылынан 43 шақырым, Исатай ауданының Зинеден ауылынан 56 шақырым қашықтықтағы аумақта анықталды. Екінші өрт кеше, 9 қазанда «Ақжайық» мемлекеттік табиғи резерват аумағында тұтанды. Қазір аңшылық маусымы өтіп жатыр. Қамыс өртінің тұтануына аңшылардың далада от жағуы мен темекі тұқылын тастауы себеп болуы мүмкін. Соңғы екі күнде тікұшақпен қамыс өртіне 31 тонна су төгілді», -деп хабарлады Бағдат Абдуллин.
Оның айтуына қарағанда, Каспий теңізінің жағалауындағы қамыс өртіне көлікпен жету қиындық тудырып отыр. Өйткені, өрт сулы, батпақты жерде тұтанған.
«Қазір департаментте 123 техника бар. Жергілікті әкімдікке батпақты аумақта өртті сөндіруге қажетті шынжырлы табанды, жол талғамайтын трактор түріндегі арнайы 4 техниканы сатып алуға ұсыныс берілді», -деп мәлім етті Бағдат Абдуллин.
Облыстық экология департаменті басшысының міндетін атқарушы Ерлан Есеновтің дерегіне сүйенсек, Атырау қаласының бірнеше бөлігінде түтіннің иісіне байланысты атсосфералық ауаның сапасына мониторинг жүргізілген.
«Мониторинг кезінде күкіртті сутек, көміртек, азот диоксиді секілді ластаушы заттардың ингриденттері қамтылды. Ауаға тараған зиянды заттардың шекті мөлшерден асу дерегі тіркелді», -деп мәлім етті Ерлан Есенов.
Еске сала кетелік, бұған дейін 7 қазанда Каспий теңізінің жағалауындағы 5 гектар аумақта қамыс өртеніп жатқанын жазған едік.
Ал, 8 қазанда Каспий жағалауындағы қамыс өртін сөндіруге тікұшақпен 30 тонна су төгілді.
Сондай-ақ, кеше Атырауда «Ақжайық» табиғи резерватының аумағында қамыс өртенді.