Атом бомбасымен байланысты зұлмат оқиғаны адамзат зор қасіретпен еске алады

АСТАНА.  6 тамыз. ҚазАқпарат - Бүгін елордадағы «Отан Ана» монументіне осыдан 67 жыл бұрын Хиросима мен Нагасаки қалаларына атом бомбасы тасталған зұлмат күнге орай гүлдестесі қойылды.

Аталған шара Ядролық қаруға  тыйым салу үшін күрестің  бүкіләлемдік  күніне арналды.

«Сол бір қайғылы оқиғадан бері 67 жыл өтті. Бұл аз да, көп те уақыт емес. Сіздер Чернобыльдағы, 450-ден астам жарылыс жасалған Семей полигонында өткізілген ядролық сынақтардағы және «Фукусима» АЭС-тегі соңғы оқиғадағы қайғылы жайттарды жақсы білесіздер. Атом бомбасы қаруымен байланысты оқиғаларды бүгінде адамзат баласы зор қасіретпен еске алады», - деді «Нұр Отан» ХДП Астана қалалық филиалының өкілі Қайрат Ахметов.

Іс-шараға қатысушылар ядролық жарылыс құрбандарын бір минут үнсіздікпен еске алды.

Сонымен қатар бүгін «Атамекен» этно-мемориалды кешенінде Жапония, Ресей, Украина, Беларусь Елшілері сөз сөйлейді деп күтілуде.  Шара барысында Хиросима мен Нагасаки, Семей полигоны, Чернобыль, «Фукусима» атом электр стансаларындағы қайғылы оқиғаларға арналған видиофильм көрсетіледі.