Қала басшысы ескерткіш маңында құстар көп жиналатынын айтып, антисанитарияға шағымданды.
«Қаламыздың аға буын өкілдері, көзі ашық көкірегі ояу әр азаматтың мазалайтын мәселелерінің бірі – қаламызда орналасқан қазағымыздың мақтанышы, ұлт зиялысы, еліміздің тұңғыш академигі Қаныш Имантайұлы Сәтбаев ескерткішінің бүгіндегі сыйқы. Бұған себеп ел сыйлаған ағамыздың жалғыз ескерткішінің басына көгершіндер қонып, құстардың мекеніне айналған. «Арнаулы автобаза» қызметкерлері қажетті тазалық жұмыстарын жүргізгенмен, бұрынғы қалпына қайта түсуде», – деп жазды Шәкір Кейкін әлеуметтік желідегі парақшасында.
Әкім осы мәселені шешу үшін учаскелік полиция, «Арнаулы автобаза» ЖШС басшысы және жауапты бөлім басшыларымен бірге аталған орынға барып қайтқан. Сөйтіп абаттандыру қағидасын бұзғандарға құқық бұзушылық талаптарына сай шара қолдануды тапсырғанын айтады.
«Расымен, тазалық жұмыстары жүргізілгенмен, қайтадан қоректенуге келген құстардың саңғырығынан алаңда аяқ алып жүру мүмкін емес, антисанитарлық жағдай десек артық болмас. Осы мақсатта қала тұрғындарына бұл жерге келіп құстарды қоректендірмеуге ұсыныс білдіремін әрі арнайы хабарландыру жазылып, таратылатын болады. Өмірден өткен ұлы тұлғаларға ескерткіш орнату еліміздің тарихын, елдігімізді білдіреді. Осыған байланысты полиция басшылығына алдағы уақытта көгершіндерге тамақ қалдығын тастаған азаматтар мен азаматшыларға абаттандыру қағидасын бұзғаны үшін құқық бұзушылық талаптарына сай шара қолдануды тапсырдым.
Әрине, көгершін – бейбітшілік символы екені сөзсіз. Бірақ бүгінгі ескерткіш басындағы көрініс бұл түсінікке сай келмейді. Қазақтың маңдайына біткен нар тұлғамыз, өмірге екі келмейтін ағамыздың ескерткішіне сыйластықпен қарап, тұрғындар менің ұсынысымды қолдайды деп есептеймін. Осы мақсатта қала тұрғындарын бұл жерге келіп, көгершіндерге нан қалдықтары мен басқа да тағамдарды тастамауға шақырамын!» - деді ол.
Айта кетейік, Шәкір Кейкін жуырда облыс әкімі Серік Шәпкеновтің өкімімен, Президент Әкімшілігінің келісімімен Атырау қаласының әкімі лауазымына тағайындалған болатын.