Атырау облысында КамАЗ-бен соқтығысқан жеңіл көліктің 3 жолаушысы мерт болды
Атырау облыстық полиция департаментінің баспасөз қызметінен мәлім еткендей, жол-көлік оқиғасы бүгін, 18 шілдеде болған.
«Жергілікті уақытпен сағат 15:30 шамасында Атырау-Индер тас жолының 123-шақырымы тұсында Toyota Camry мен КамАЗ жүк көлігі соқтығысқан. Жол-көлік апатынан Toyota Camry автокөлігінде болған 3 жолаушы оқиға орнында мерт болды. Ал жеңіл көліктің жүргізушісі ауруханаға жеткізілді. Қайтыс болғандар анасы мен 1 және 15 жастағы қыздары екені анықталды. Олар – Батыс Қазақстан облысының тұрғындары», - деп хабарлады Индер аудандық жергілікті полиция қызметі бөлімшесінің бастығы, полиция подполковнигі Батырбек Қайыржанов.
Сондай-ақ бүгін сағат 14:20 шамасында Атырау қаласындағы Владимирский көшесі Lada – 2115 және Toyota Estima автокөлігімен соқтығысты. Жол-көлік оқиғасына Lada – 2115 көлігінің рульінде болған 1986 жылғы жүргізушісі басқару жүйесін игере алмай, жолдың қарсы жолағына шыққаны себеп болған. Соққының салдарынан Toyota Estima автокөлігінің 43 жастағы жүргізушісі әртүрлі дене жарақатымен облыстық ауруханаға жеткізілді.
Еске сала кетелік, бұған дейін Атырау облысындағы республикалық жолдарда көлік апатынан 33 адам көз жұмғанын хабарлаған едік.
Патрульдік полиция ротасының командирі, полиция капитаны Әділбек Шахметовтің мәліметінше, жыл басынан бері жылдамдықты асырған 12 мыңнан астам жүргізуші анықталған.
«Атырау облысының аумағымен өтетін республикалық маңызы бар тас жолдарда жыл басынан бері 38 жол-көлік оқиғасы тіркелді. Көлік апатының салдарынан 33 адам мерт болды. Ал, 57 адам әртүрлі дене жарақатын алды. Жол-көлік оқиғасының басым бөлігі жүргізушілердің басып озу ережесін бұзуы, жылдамдықты шамадан тыс асыруы салдарынан болып отыр», - деп мәлім етті Әділбек Шахметов.