Атырау облыстық санитариялық-эпидемиялогиялық бақылау департаментінің бөлім басшысы Айнагүл Сәрсенғалиеваның мәліметінше, 2 наурыздан 7 қыркүйекке дейін қызылша жұқтыру күдігімен 372 жағдай анықталған.
«Мұндай деректің дені Атырау қаласында байқалып отыр. Қала тұрғындарынан 337, Жылыой ауданында 16, Құрманғазыда – 7, Махамбетте – 6, Исатай, Қызылқоға, Индер аудандарында 2 жағдай анықталды. Зертханалық талдау қорытындысымен қызылша жұқтырудың 269 дерегі тіркелді. Қызылша инфекциясының алдын алуға бағытталған күрестің жалғыз әрі тиімді шарасы – вакцина салдыру», - дейді Айнагүл Сәрсенғалиева.
Оның айтуынша, балаларды қызылшаға қарсы вакцинациялау қызылша, қызамық және эпидемиялық паротитке қарсы біріктірілген вакцина егу арқылы жүзеге асырылады.
«Бұл вакцина Дүниежүзілік денсаулық сақтау ұйымы тарапынан сертификатталған. Вакцинаны Ұлттық егу күнтізбесіне сәйкес 12-15 айлық кезде, әрі қарай ревакцинациялау 6 жаста жүргізіледі. Осы кезге дейін 9 649 адам қызылшаға қарсы вакцина салдырды», -деп мәлім етті Айнагүл Сәрсенғалиева.
Еске сала кетелік, бұдан бұрын Атырау облысында 5 айда қызылша жұқтырудың 202 дерегі тіркелгенін жазған болатынбыз.
Атырау облысында биылғы наурыз айында аталған аурудың 4 жағдайы тіркелген. Алғашқы жағдай шет елден келген жасөспірімнен анықталған. Түркия елінен келген азаматтың баласы вирусты сол жақтан жұқтырып келген. Ал, бес айда осындай 202 дерек тіркелген.