Атырау облысындағы Ойыл өзенінде балық қырылып жатыр
Балық шаруашылығы комитетінің баспасөз қызметінен мәлім еткендей, бұл туралы кеше, 7 шілдеде сағат 23:00-де ақпарат түскен.
«Өзара іс-қимыл схемасына сәйкес, бұл жайт туралы барлық мүдделі мемлекеттік және жергілікті атқарушы органға жедел түрде хабарланды. Осы ақпаратты тексеру үшін 2023 жылғы 8 шілдеде Жайық-Каспий облысаралық балық шаруашылығы бассейндік инспекциясының басшысы мен орынбасары, жергілікті атқарушы орган қызметкерлерінен құралған комиссия балық қырылды деген орынды тексеру үшін жолға шықты», -деп хабарлады комитеттің баспасөз қызметі.
Еске сала кетелік, бұған дейін су тасқынына байланысты Атырау облысында жол жырылып, көлік қатынасы тоқтатылғанын жазған едік.
«Индер-Қарабау-Миялы-Сағыз» тас жолының 248-260 шақырымында көлік қозғалысы шектелді. Жолдың бұл бөлігі Қызылқоға ауданының орталығы Миялы мен оған көршілес Жангельдин ауылын жалғайды.
Кейін Атыраудағы Нарын каналында балық қырылғанын хабарлаған болатынбыз.
Атырау облыстық балық шаруашылығы басқармасының басшысы Артур Сәдібекұлының айтуынша, Нарын каналы Исатай ауданында орналасқан.
«Нарын каналында балықтың қырылу дерегі анықталды. Осыған байланысты арнайы комиссия құрылды. Комисся мүшелері бекітілген балық қырылған аумаққа барып, тиісті алгоритмге сәйкес мәселенің мән-жайын зерделеуді бастады. Комиссия құрамында Атырау облыстық балық шаруашылығы басқармасының, Жайық-Каспий облысаралық балық шаруашылығы инспекциясы мен экология департаментінің өкілдері бар», - деп хабарлаған еді Артур Сәдібекұлы.