Атырау облысының екі ауданында карантин режімі жалғасуда
04:28, 08 Қазан 2016
АТЫРАУ. ҚазАқпарат - Атырау облысының Құрманғазы және Исатай аудандарында, сондай-ақ 3 қала маңындағы кентте карантин режімі жалғасады. Карантин тамыз айында ірі қара мал арасында нодулярлық дерматит шыққан кезде жарияланған.
«Нодулярлық дерматиттен зардап шеккен шаруашылықтарда ауырған сиырларды емдеу жалғасатындықтан карантин әзірге алынбайды. Аталған малдарды басқа аудандарға әкетуге тыйым салынған. Оларды сою тек шаруашылық аумағында жүргізіледі», деп хабарлады ветеринарлық бақылау және қадағалау комитетінің облыстық аумақтық инспекцияның басшысы Ғалымбек Бисенғалиев.
Өңірлік ветеринарлық дәрігердің айтуынша, санитарлық шаралардың арқасында індеттің таралуына жол берілмеген. Малды емдеуге бюджеттен 4,5 миллион теңге бөлінді. Індетке шалдыққан 6 мың сиырдың 727-сі өлді. Ауырған малдың көп бөлігі емделді, қалғандарына әлі де антибиотик берілуде.