АЛМАТЫ. ҚазАқпарат – «Атырау» волейбол клубы суперкубок иегері атанды, деп хабарлайды ҚазАқпарат тілшісі.
Суперкубок үшін матч Алматы қаласындағы «Достық» спорт кешенінде ерлердің Ұлттық лига командалары арасында ХХХІ ел чемпионатының бірінші туры аясында өтті.
Биыл ел чемпионы атанып, кубокты қоса ұтып алған атыраулықтар мен Алматының «Буревестник» командасы алаңға шықты.
Рафаиль Гилязутдинов жаттықтыратын алматылықтар бұған дейін үш жыл қатарынан суперкубокты ұтып алған болатын. Биыл ел кубогы үшін финалда олар атыраулықтарға жол берген еді.
Бұл жолы да матч өте тартысты өтті. Бірінші партияда алматылықтар 25:22 есебімен басым түсті. Әйтсе де содан кейін Виктор Козиктің шәкірттері ойын тізгінін өз қолына алды – 28:26, 25:16, 25:23.
Осылайша, 3:1 есебімен жеңіске жеткен атыраулықтар биылғы суперкубок иегері атанды.
Еске сала кетейік, бұдан бұрын Алматыда ерлер арасында ел чемпионаты басталғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).