Атырау облысының әкімдігі мен Х.Досмұхамедов атындағы Атырау мемлекеттік университетінің ұйымдастыруымен өткен конференция жұмысына Қырғызстан, Өзбекстан, Түркия, Әзербайжан, Ресей елдерінен келген ғалымдар, оқытушылар мен студенттер қатысты.
ҚР Мәдениет және спорт министрлігі Тілдерді дамыту және қоғамдық-саяси жұмыстар комитетінің төрағасы Қуат Бораш атқарылып жатқан шаралар жайында баяндама жасады.
«Латын графикасына негізделген қазақ әліпбиі жасалды. Енді 2025 жылға дейін кезең кезеңмен көшу жоспарланып отыр. Маусым айының соңында алфавиттің тұжырымдамасын бекітіп, қыркүйекте Ұлттық комиссияға ұсынамыз. Содан кейін латын қарпіне оқу-әдістемелік жағынан көшу басталады», - деді Қуат Бораш.
Конференцияға қатысқан Атырау облысының әкімі Нұрлан Ноғаев филологтар мен тіл мамандарының алдағы жұмыстарына табыс тіледі.
«Латын қарпіне көшу әрқайсымыз үшін маңызды, бұл тарихи оқиға. Бүгінгі шара ғалымдардың пікір алмасуларына, осы тақырып бойынша теориялық, тәжірибелік мәселелерді шешуге бағытталған. Латын әліпбиіне көшу мемлекеттік тілімізге де оң ықпал етеді, қазақ тілінің дамуына септігін тигізеді, оны заманауи ғылым мен техниканың тіліне айналдырады. Конференцияда талқыланған маңызды мәселелер бойынша қабылданған шешімдер тиімді боларына сенім білдіремін», -деп атап өтті Нұрлан Ноғаев.
Сонымен қатар, конференция аясында аймақ басшысы Нұрлан Ноғаев пен университет ректоры Абзал Талтенов социолингвист, филология ғылымының докторы, профессор, Атырау өлкесінің тумасы Бақытжан Хасанұлын мерейлі 80 жасымен құттықтап, иығына шапан жауып, мерейгер иесіне дарынды тұлғаларға арналған алтын төсбелгісін табыстады.
Айта кетейік, конференция бүгін «Жаһандану кезеңіндегі әлемдік коммуникациядағы латын графикасының рөлі», «Қазақ жазуын латын әліпбиіне көшіру, әлемдік тәжірибе және ғылыми-әдіснамалық ұстанымдар», «Рухани жаңғыру:Ұлттық білім жүйесіндегі инновациялық әдістеме» тақырыптарында 3 секция аясында өтіп жатыр.