Мұнайлы өңірдегі №2 облыстық аурухананың директоры Мағжан Сиджановтың мәліметіне сүйенсек, модульдік аурухана мен №2 облыстық аурухананың инфекциялық стационарларындағы төсек-орындардың 94 пайызы науқастармен толған.
«Қазір инфекциялық стационарда 61 жүкті әйелге қоса, 11 босанған ана 8 сәби ем қабылдау үшін оқшауланды. Модульдік аурухананың жансақтау бөлімінде 20 пациент жатыр. Оның алтауы өкпені жасанды желдету аппаратына қосылған. Ал, №2 облыстық аурухананың жансақтау бөлімінде 16 науқас емделуде», -деді Мағжан Сиджанов.
Оның айтуынша, аталған ауруханалардың инфекциялық стационарларында бос орын азайған. Мәселен, модульдік ауруханада 15, №2 облыстық ауруханада 12 бос орын қалған.
Еске сала кетелік, бұған дейін Атырауда жансақтау бөлімінде 46 науқас жатқанын
хабарлаған едік.