Атырауда оқушыларды қашықтан оқыту үшін 3000 компьютер сатып алынады
Атырау облысы әкімінің орынбасары Бақытгүл Хаменованың төрағалығымен өткен селекторлық жиында оқушыларды қашықтан оқыту мәселесі кеңінен талқыланды. Жиында аудан әкімдерінің орынбасарлары мен жоғары оқу орындарының ректорлары, колледж директорлары және «Қазақтелеком» АҚ-ның басшылығы 2020-2021 оқу жылына дайындық барысын пысықтады.
«Қашықтан оқыту режимінде әр оқушының, әр мұғалімнің компьютерлік техникамен қамтылуын, интернет желісіне қолжетімділігін қамтамасыз етуіміз қажет. Қашықтан оқытуда шалғайдағы елді мекендерді интернет желісіне қосу, мектептердегі ғаламтор желісінің жылдамдығын және тарату нүктелерінің санын көбейту жұмыстарын «Қазақтелеком» АҚ-мен бірлесе шешуіміз қажет. Үнемделген қаражатқа сатып алынған компьютерлік техникалар бірінші кезекте әлеуметтік жағдайы төмен, көпбалалы отбасыдан шыққан оқушыларға берілуі тиіс»- деді Бақытгүл Хаменова.
Атырау облысында 2013 жылдан бері компьютерлік жиынтықтар көп мөлшерде сатып алынбаған. Ал, 2017-2019 жылдары аз көлемде әкелінгенген компьтерлер стем, робототехника сынды арнайы кабинеттерге қойылған. Ал, биылғы мамырда демеушілер 1310 компьютер сатып алып берген. Енді жаңа оқу жылына дейін тағы да 3000 компьютер сатып алу күтіліп отыр.
Еске сала кетелік, бұған дейін Атырау облысында карантин күшейтілген болатын.