Облыс әкімдігінің жанынан құрылған жедел ақпарат штабының мәліметіне сүйенсек, бұл шара Атырау облысындағы коронавирус індетінің өсіміне байланысты туындап отыр. Өңірге бұған дейін 300-ден астам мұнайшы келген болатын.
«Бүгін тағы 55 вахташы оралады. Олардың барлығы – «Теңізшевройлда» жұмыс істеп жүрген Қостанай облысының тұрғындары. Аталған азаматтардан індет белгілерінің бар-жоғын анықтау мақсатында сауалнама алынып, термометрия жүргізіледі. Содан соң олар уақытша оқшаулау орындарына, облыс орталығының карантин стационарларына жеткізіледі. Ол жерде COVID-19-ға терең зерттеу жүргізу үшін сынама алынады. Зерттеу қорытындысы теріс нәтиже көрсеткен жағдайда, жазбаша қолхат алынып, жұмысшылар 14 күндік инкубациялық кезең аяқталғанға дейін үй карантиніне жіберіледі», - деп хабарлады облыстық жедел ақпарат штабы.
Ал талдау қорытындысы оң нәтиже көрсеткен жұмысшылар инфекциялық бөлімге жатқызылады.