Әуежайда қол жүгіне қатысты жаңа ережелер енгізілді: нені білу қажет

АЛМАТЫ. KAZINFORM – Қазақстан әуежайларында жаңа ереже күшіне енді.

Алматы халықаралық әуежайы авиациялық қауіпсіздік ережелеріне енгізілген өзгерістер мен толықтыруларға қатысты түсініктеме берді.

- Жаңа авиациялық қауіпсіздік талаптарына сәйкес, еліміздің барлық әуежайы, соның ішінде Алматы халықаралық әуежайы да әуе кемесімен тасымалдауға тыйым салынған заттарды сақтау тәжірибесін тоқтатады. Аталған өзгерістер авиациялық қауіпсіздік жүйесін халықаралық тәжірибе мен стандарттарға сәйкестендіру, сондай-ақ жолаушыларға қызмет көрсету процесін оңтайландыру және қауіпсіздік рәсімдерін жеделдету мақсатында қабылданды, - деп хабарлады әуежайдан.

Сонымен қатар қол жүгінде көлемі 100 мл-ден асатын сұйықтықтарды, аэрозольдерді және гельдерді, сондай-ақ басқа да қауіпті заттарды алып жүруге тыйым салынады. Одан бөлек авиациялық қауіпсіздік талаптарына сәйкес, зауыттық қаптамасы жоқ өнімдерді де азаматтық әуе кемелерінде тасымалдауға болмайды. Мұндай заттар тексеру барысында алынып, кейін белгіленген тәртіппен жойылады.

- Тәркіленген немесе авиациялық қауіпсіздік талаптарына сәйкес келмейтін заттарды жолаушылар шығарып салушы азаматтарға қалдыра алады. Қауіпсіздік талаптарымен алдын ала танысу жолаушыларға тыйым салынған заттардың алуға жол бермеуге, сондай-ақ бақылау рәсімдерінен жылдам әрі ыңғайлы өтуге мүмкіндік береді, - деп түсіндірді Алматы әуежайы.

Еске салайық, бұған дейін Алматы әуежайында ер адам өзін өртемек болды.

Кейін ер адам бұл әрекетке не үшін барғаны белгілі болды.