АЛМАТЫ. KAZINFORM — Өңірлік коммуникациялар қызметінде өткен брифингте «Алматы Су» мемлекеттік коммуналдық кәсіпорнының өтім департаментінің директоры Серік Шағыров прокуратура шешімімен келіспейтінін мәлімдеді.
— Салынған айыппұл заңды. Біз оны дәлелдедік. Барлық айыппұл қолданыстағы құқықтық актінің нормаларына сәйкес шығарылды. Алайда, біз келіспейтін прокурорлық қадағалау актісі шықты. Біз бұл акт бойынша белгіленген талаптар аясында шағымданамыз, — деп жауап берді спикер.
Еске салайық, бұған дейін Алматы прокуратурасы әуежайға салынған 122 млн теңге айыппұл заңсыз деп таныған болатын.
Атап айтқанда, Түрксіб ауданының прокуратурасы қадағалау актісін енгізіп, заңсыз әрекеттердің жолын кесті. Айыппұл мен қосымша төлемдер жойылды.
Алма Мұқанова
Алма Мұқанова Т. Жүргенов атындағы өнер академиясының «Кино және Телевизия» факультетінің түлегі. Журналистика саласында 20 жылдан бері еңбек етіп келеді. Аймақтық, республикалық телеарналарда түрлі қызметтер атқарған. 2019 жылдан бері - ҚазАқпарат агенттігінің тілшісі. ҚР Журналистер одағының мүшесі.