АСТАНА. ҚазАқпарат – Алғашқы «Үлкен дулыға» турнирі – Аустралия ашық чемпионаты 16 қаңтар күні басталады, деп хабарлайды ҚазАқпарат тілшісі.
Қазақстан теннис федерациясынан мәлім еткендей, ертең қазақстандықтардан бірінші болып Елена Рыбакина кортқа шығады.
Рыбакина алғашқы айналымда дүниежүзілік рейтингіде 67-орында тұрған италиялық Элизабета Коччареттомен шеберлік байқасады.
Қарсыластар өзара 2017 жылы жасөспірімдер US Open турнирінде кездесіп, Рыбакина 6:4, 6:0 есебімен жеңіске жеткен еді.
Аустралия ашық чемпионатын ұйымдастырушылар Уимблдон чемпионы Елена Рыбакинаның матчын шеттегі 13-кортқа қойған. Белгілі журналист Бен Ротенберг бұл шешімді сынады.
«Әйелдер арасындағы «Үлкен дулыға» ойындарының, турнирде жеңімпаз атанғандардың аз еместігін түсінемін. Бірақ, Уимблдонның чемпионы қашан осыншалықты тез еленбей қалып еді?» - деп жазды Ротенберг әлеуметтік желіде.
Еске сала кетейік, бұдан бұрын қазақстандық жас теннисшілердің Делидегі жарыстың жеңімпазы атанғанын жазған болатынбыз.
Фото: ktf.kz
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).