НҰР-СҰЛТАН. ҚазАқпарат – Қазақстанның бірінші, әлемнің 45-ракеткасы Александр Бублик Аустралия ашық чемпионатының екінші айналымына шықты, деп хабарлайды ҚазАқпарат тілшісі.
А.Бублик бастапқы кездесуін рейтингте 58-орында тұрған словениялық Аляж Беденемен өткізді.
Бірінші партияда қазақстандық теннисші басымдылығын танытты – 6:4.
Екінші сетте есеп 5:5 болған мезетте А.Бублик брейк жасай білді. Сосын өз геймінде мүмкіндігін жіберген жоқ – 7:5.
Есесіне үшінші партияны А.Бедене брейкпен бітірді – 7:5.
Төртінші сетте есеп 4:4 болған мезетте қазақстандық спортшы брейкке қол жеткізді. Содан кейін екінші матчболын пайдалана алды – 6:4.
Тартысты өткен бәсеке 2 сағат 38 минутқа созылды.
А.Бублик екінші айналымда әлемнің 26-ракеткасы, сербиялық Душан Лайович немесе рейтингте 201-сатыдағы украиналық Сергей Стаховскийдің біреуімен кортқа шығады.
Өткен жылы осы «Үлкен дулыға» додасында А.Бублик те, М.Кукушкин де алғашқы айналымнан аса алмаған болатын.
Еске сала кетейік, бұдан бұрын Зарина Диястың Аустралия ашық чемпионатын жеңіспен бастағанын, ал Михаил Кукушкиннің АҚШ чемпионынан ұтылып қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).