НҰР-СҰЛТАН. ҚазАқпарат – Жұптық сында Қазақстанның бірінші ракеткасы Анна Данилина Аустралия ашық чемпионатының ширек финалына шықты, деп хабарлайды ҚазАқпарат тілшісі.
Қазақстан теннис федерациясы мәлім еткендей, А.Данилина бразилиялық Беатрис Хаддад Майямен бірге үшінші айналымда испаниялық Алена Большова – норвегиялық Ульрикке Эйкеримен шеберлік байқасты.
Испаниялық-норвегиялық жұп бірінші партияда 6:4 есебімен басымдық танытты.
Екінші сетте Беатрис пен Анна есе қайырды – 6:3. Үшінші, шешуші партияда 1:4 есебімен жеңіліп жатып, таразы басын теңестіре білді. Содан кейін тай-брейкте жеңісті жұлып алды – 7:6 (10:5).
Қазақстандық-бразилиялық жұп 2 сағат 34 минутқа созылған тартысты матчта 1 эйс жасап, 14 брейк-пойнттың алтауын өз есептеріне жазды. Қарсыластары 2 эйс, 6 брейкпен (9 брейк-пойнт) ерекшеленді.
Анна мен Беатрис жартылай финалға шығу үшін швециялық Ребекка Петерсон – ресейлік Анастасия Потаповамен таласады.
Еске сала кетейік, осыған дейін Аустралия ашық чемпионатында қос қазақстандық жасөспірім теннисші бақ сынайтынын жазған болатынбыз.
Ал Андрей Голубев аралас сында екінші айналымға шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).