АСТАНА. KAZINFORM – Қазақстандық, 17 жастағы Асылжан Арыстанбекова жұптық сында жасөспірімдер арасында Аустралия ашық чемпионатының жартылай финалына шыға алмады.
Қазақстандық теннисші Беларусь өкілі Юлия Перепихинамен бірге ширек финалда жарыстың 2-ракеткалары, ұлыбританиялықтар Ханна Клагмен – Мингге Сюймен шеберлік байқасты.
Бір сағатқа жетпейтін уақыт ішінде ұлыбританиялық жұп 6:2, 6:2 есебімен ұтты. Олар 2 эйспен бірге 13 брейк-пойнттың жетеуін мүлт жіберген жоқ.
Қазақстандық-белоруссиялық дуэт эйс жасамағанымен, 5 брейк-пойнттың үшеуін пайдаланды. Осылайша, Асылжан Арыстанбекова жартылай финалдан тыс қалды.
Аустралия ашық чемпионатында Қазақстаннан Әмір Омарханов қана қалды.
Еске сала кетейік, бұдан бұрын Аустралия ашық чемпионатында жасөспірімдер арасында қазақстандықтардан алғаш болып Әмір Омархановтың ширек финалға шыққанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).