ОРАЛ. 22 қаңтар. ҚазАқпарат - Теннистен Австралияның ашық чемпионатында ерлер арасында да күтпеген нәтиже тіркелді.
Кеше швейцариялық, әлемнің сегізінші ракеткасы Станислас Вавринка мен сербиялық, рейтингте екінші орында тұрған, Австралия ашық чемпионатының төрт мәрте жеңімпазы Новак Джоковичтің арасындағы ойынның шиеленіскені сондай, төрт сағатқа созылды. Бес партияның қорытындысында (2:6, 6:4, 6:2, 3:6, 9:7) бұған дейін Новактан ұтылып жүрген С.Вавринка қарсыласынан басым түсті. Сөйтіп ол Н.Джоковичтің Австралияның ашық чемпионатындағы 25 ұтыстан тұратын жеңісті жолын тоқтатып, жартылай финалға жолдама алды. Онда чехиялық, әлемдік рейтингте жетінші сатыда тұрған, бұған дейін Австралия біріншілігінің финалында бір рет ойнап, Р.Надальдан ұтылып қалған Томаш Бердыхты жеңсе, талайдың арманына айналған финал да жақын тұр.
Әлемнің бірінші ракеткасы, испаниялық Рафаэль Надаль бүгін ширек финалда болгар Григор Димитровпен, ал тағы бір швейцариялық Роджер Федерер ұлыбританиялық Энди Марреймен күш сынасады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).